KUCHING: Raban Nembiak Parti Pesaka Bumiputera Bersatu Sarawak (PBB) deka ngatur aum enggau Gerempung Sa’ati Rayat Sarawak (SUPP) ngadu pelin kena napi pengawa bepilih mit Sitak Parlimen Sibu ti deka datai.

Tuai Raban Nembiak PBB, Fadillah Yusof madahka aum enggau raban nembiak SUPP nya deka diatur berebak enggau pengerami begelumu nembiak PBB ti deka diatur ba Sibu kena 30 April ngagai 2 Mei tu ti deka datai.

Ku iya dulu ari tu aum nembiak PBB tu ditetapkan diatur ba Kuching.

Tang laban pengawa bepilih mit Parlimen Sibu dia ia lalu diputus deka diatur ba Sibu.

Ku Fadillah, amat meh raban tu udah besedia deka napi pengawa bepilih nya tang sida deka ngaluska atur lalu ngemaska injin raban nembiak tu.

“Suba kami netap pengerami begelumu raban nembiak PBB tu digaga ba Kuching, tang udah ti ngenang pengawa bepilih mit Sibu dia kami ngaga pemutus ngatur pengerami tu ba Sibu.

“Lalu rambau pengerami tiga hari tu dia nembiak PBB mega deka ngatur aum enggau raban nembiak SUPP ngena ngelichin sereta ngemas injin raban nembiak ti dikena napi pengawa bepilih nya,” ku iya.

Iya mansutka jaku tu lebuh berandau enggau pemberita Iban ditu, kemari.

Komiti Pengawa Bepilih (SPR) udah netapka 8 Mei ti deka datai maya ngantung nama ke pengawa bepilih mit parlimen tu.

Berebak enggau nya, SPR meri awak tujuh hari ngagai raban parti ti betanding ba pengawa bepilih tu bejalaika kimpin apin ti muai undi kena 16 Mei.

Sitak Parlimen Sibu puang udah bekau pemati niang Datuk Robert Lau ti mangku penuduknya kenyau ari taun 1990.

Datuk Robert Lau ti mega Sapit Menteri Pengangkut parai kena 9 April tu tadi.

Sibu ngembuan 54,695 pengundi berejista lalu ari penyampau nya dia 2,537 pengundi pos ari sedadu enggau polis.

Nama pengari SUPP ti deka ngetanka penuduk ti ngarika perintah Barisan Nasional deka dipansutka enda lama agi.